ASKOFU KULOLA AMETESEKA SIKU 365 ....

Marehemu Kulola aliyefariki dunia saa 5:35 juzi baada ya kusumbuliwa na matatizo ya moyo na mapafu, alianza kusumbuliwa na maradhi hayo karibu mwaka mmoja uliopita.

KILA mtu anajua kufariki dunia kwa aliyekuwa Askofu Mkuu wa Kanisa la Evangelist Assemblies of God (EAGT), Moses Kulola katika Hospitali ya African Medical Investment (Ami) iliyopo wilayani Kinondoni jijini Dar.

ASKOFU KULOLA AMETESEKA SIKU 365
Kwa mujibu wa mjukuu wa marehemu, Flora Mbasha, baada ya hali yake kutoridhisha, alipelekwa nchini India kwa matibabu zaidi lakini hata aliporudi hali yake haikuwa nzuri.
FLORA MBASHA AZIMIA
Hata hivyo, baada ya kuzungumza na Flora alipata mshtuko wa kifo hicho cha babu yake.
Alipelekwa hospitali na mumewe, Emmanuel Mbasha na ndugu wengine ambako alipumzishwa kwa karibu nusu saa. Mbasha alilihakikishia gazeti hili kuwa kweli mkewe alipoteza fahamu na kutokana na msiba huo, amelazimika kuahirisha shoo kubwa ambayo ilikuwa ifanyike Septemba 15, mwaka huu.
Kwa mujibu wa ndugu wengine, marehemu Kulola ameishi duniani kwa miaka 85, alizaliwa 1928, Mwanza katika familia yenye watoto kumi, watano wakiwa wameshatangulia mbele ya haki.
WATOTO KUMI
Marehemu alifunga ndoa na Elizabeth Kulola na kujaliwa kupata watoto kumi, watatu wakiwa wametangulia mbele ya haki.
Uhakika wa idadi ya wajukuu aliowaacha hauko wazi, lakini habari zinasema ameacha wajukuu zaidi ya 45 na vitukuu kibao kwa mkewe Elizabeth.
AANZA KUHUBIRI
Mwaka 1962 alianza kuhubiri akiwa mfanyakazi wa serikali. Mwaka 1964 ndipo alipoamua kuweka nguvu zake zote katika kumtumikia Mungu huku akiwa anasomea utumishi wa Bwana. Mwaka 1966 alimaliza masomo akiwa na stashahada.
AANZISHA MAKANISA ELFU NNE
Mwaka 1992 ndipo alipoanzisha kanisa la EAGT ambalo lilipata mafanikio makubwa sana katika nchi za Tanzania, Malawi na Zambia na yeye kuwa askofu mkuu akiwa na msaidizi wake, Mwaisabira wakisimamia makanisa elfu nne katika maeneo hayo.
WACHUNGAJI WALIOTOKANA NA YEYE
Marehemu atakumbukwa kwa kuzalisha  watumshi wengi wa Mungu nchini Tanzania wakiwemo,  Dr. Daniel Moses Kulola (mwanaye), Mchungaji Florian Katunzi, Askofu  Zakaria Kakobe, Antony Lusekelo ‘Mzee wa Upako’, Dunstan Maboya, Mwasota na wengineo wengi.
ALIAMURU NYWELE ZAKE ZISIREFUKE
Katika utumishi wake inadaiwa marehemu hajawahi kwenda saluni kupunguza nywele kwa miaka 47 iliyopita baada ya kuziamuru kwa jina la Yesu zisirefuke.
Mpaka tunakwenda mitamboni, msiba wa marehemu Moses Kulola ulikuwa Kanisa la EAGT Temeke, Dar. Mwili wa marehemu umehifadhiwa Mission Mikocheni Hospital ‘Kwa Kairuki’ kabla ya kusafirishwa Mwanza kwa mazishi.
Bwana ametoa, Bwana ametwaa, jina lake lihimidiwe. Amin

TOA MAONI YAKO HAPA CHINI